Act 26 | NdeIBE | STEP | U-Agripha wasesithi kuPhawuli, “Ulemvumo yokuzikhulumela.” Yikho uPhawuli wasephakamisa isandla sakhe waqalisa ukuzivikela kwakhe, wathi:

Acts 26

1 U-Agripha wasesithi kuPhawuli, “Ulemvumo yokuzikhulumela.” Yikho uPhawuli wasephakamisa isandla sakhe waqalisa ukuzivikela kwakhe, wathi: 2 “Nkosi Agripha, ngizibona ngilenhlanhla ukuma phambi kwakho lamuhla ngisethula ukuzivikela kwami kuwo wonke amabhada okungigcona kwabaJuda, 3 ikakhulu njengoba wena uyawazi amasiko abaJuda kanye lokuphikisana kwabo. Ngakho ngiyakucela ukuthi ungilalele ngokubekezela.

4 “AbaJuda bonke bayayazi impilo engiyiphilileyo kusukela ebuntwaneni bami, ekuqaleni kokuphila kwami elizweni lakithi njalo laseJerusalema.

5 Sebengazi okwesikhathi eside njalo bangafakaza, uma bethanda, ukuthi ngezinhlelo zenkolo yethu ezemicingelelo, ngangiphila ngingumFarisi. 6 Manje sekungenxa yethemba lami kulokho uNkulunkulu akuthembisa okhokho bethu okwenza ngithonisiswe lamuhla.

7 Lesi yiso isithembiso esilindelwe yizizwana zakithi ezilitshumi lambili ukuthi zizasibona sigcwaliseka zilokhu zimkhonza uNkulunkulu ngokutshiseka emini lebusuku. Mhlekazi, kungenxa yalo lelithemba engimangalelwa lona ngabaJuda. 8 Kungenzakala kanjani ukuthi phakathi kwenu kube yinto engakholekiyo ukuthi uNkulunkulu uyabavusa abafileyo na?

9 “Lami ngokwami ngangizimisele ukuthi ngenze yonke imizamo ukudiliza ibizo likaJesu waseNazaretha. 10 Lakanye yikho lokho engakwenzayo eJerusalema. Ngaphiwa amandla ngabaphristi abakhulu ngaphosela abanengi abangcwele entolongweni, kwathi ekubulaweni kwabo lami ngasekela ukubalahla. 11 Izikhathi ezinengi ngangihamba nginquma lamasinagogi ngisithi kabajeziswe, ngazama njalo ukubabamba ngamandla ukuthi bahlambaze uJesu. Ngathi ngihlanyiswa yikubazonda ngaya lakwamanye amadolobho asezizweni ukuyabahlukuluza khona.

12 “Kolunye lwalezizinkambo ngangisiya eDamaseko ngilegunya lomlayo wabaphristi abakhulu. 13 Kwathi sekungathi sekuyimini enkulu, wena Mhlekazi, ngisendleleni, ngabona ukukhanya kuvela ezulwini, kukhazimula kulelanga, kwabenyezela kungihanqile kanye labaphelekezeli bami. 14 Sonke sawa sathi dili phansi, ngezwa ilizwi lisithi kimi, ngesiHebheru, ‘Sawuli, ungihlukuluzelani na? Kubuhlungu kuwe ukukhahlela izinciji.’

15 “Ngasengibuza ngathi, ‘Ungubani, Nkosi na?’ “NginguJesu omhlukuluzayo,’ kuphendula iNkosi. 16 ‘Manje phakama ume ngezinyawo zakho. Ngizibonisa kuwe ukuthi ngikukhethe ukuba yinceku njalo ube ngufakazi walokho osukubonile ngami, lalokho engisezakutshengisa khona. 17 Ngizakulamulela ebantwini bakini lakwabeZizwe. Ngikuthuma

18 ukuthi uvule amehlo abo, ubaphendule basuke ebumnyameni baye ekukhanyeni, njalo basuke emandleni kaSathane baye kuNkulunkulu ukuze bemukele ukuthethelelwa kwezono lendawo phakathi kwalabo abangcwelisiweyo ngokukholwa kimi.’

19 “Yikho-ke, Nkosi Agripha, kangiqholozelanga umbono ovela ezulwini.

20 Ngaqala ngabaseDamaseko, kwalandela abaseJerusalema laseJudiya lonke, kwalandela labeZizwe labo, ngatshumayela ukuthi bamele baphenduke babuyele kuNkulunkulu njalo babonise ukuphenduka kwabo ngezenzo zabo.

21 Kungalesosizatho okwenza abaJuda bangibambe ngisemagumeni ethempeli bazama ukungibulala. 22 Kodwa uNkulunkulu ungiphephisile kuze kube namuhla, yikho ngimi lapha ngifakaza kwabancinyane labakhulu ngokufananayo. Kakulalutho engilutshoyo ngaphezu kwalokho abaphrofethi loMosi abathi kuzakwenzakala – 23 ukuthi uKhristu wayezahlupheka, athi, njengowokuqala ukuvuka kwabafileyo, atshumayele ukukhanya kubantu bakibo lakwabeZizwe.”

24 Khonapho uFestu wasemphazamisa esazivikela wathi, “Phawuli, usangene ingqondo! Ukufunda kwakho okukhulu sekukuphambanise ingqondo.”

25 Waphendula uPhawuli wathi, “Kangihlanyi, Mhlekazi omkhulu Festu. Engikutshoyo kuliqiniso njalo kulengqondo.

26 Inkosi izijwayele lezizinto yikho ngikhuluma kuyo ngikhululekile. Ngiyakholwa ukuthi kakukho lokukodwa kukho okuyeqileyo inkosi, ngoba kakwenziwanga ejikweni ngokucatshelana. 27 Nkosi Agripha, uyabakholwa na abaphrofethi? Ngiyazi ukuthi uyabakholwa.”

28 U-Agripha wasesithi kuPhawuli, “Kambe ucabanga ukuthi ngesikhatshana lesi esifitshane kangaka ungangiphendula ngibe ngumKhristu?”

29 UPhawuli waphendula wathi, “Loba sisifitshane langabe siside – ngiyathandaza kuNkulunkulu ukuthi kakungabi nguwe kuphela kodwa bonke abangizwayo lamuhla bangaba yilokho engiyikho mina, ngaphandle kwala amaketane.”

30 Inkosi yaphakama, kanye lombusi loBhenikhe lalabo ababehlezi labo. 31 Baphuma endlini, bathi sebekhuluma bodwa, bathi, “Indoda le kakulalutho elwenzayo olufanele ukufa loba ukutokisiswa.”

32 U-Agripha wathi kuFestu, “Indoda ibizakhululwa aluba ibingedluliselanga icala layo kuKhesari.”